نهي أباظة تكتب: بخت خايب.. وزبدة قوالب
الزبدة قوالب..والبخت لا مغلوب ولا غالب...
تبص لوشك ..تلاقيه مع ناس معدول..ومع ناس قالب
والقالب مكسور...يقولوا فيه بندق...يطلع فول... والفول يطلع معصور..تكله وانت محصور.. ترضي بيه وتقول ماشي..
وكده ماشي...وكده ماشي...
وعشان ماشي .يمشي الحال...الأجرة تبقي جنيه وريال,,,والكلمة يمشيها عيال .وشتيمتك بأسمك عيب ...بس شتيمتك بأهلك .تبقي حلال..
وعشان الحلال مابقاش كتير...تلاقيه في قالب جنب الجرجير.مع راس كرنبه...وتفكير حمير...لسان حرباية ...ولدعة قنديل ..كله متغطي بمنديل ...
أيوة بمنديل ناعم يافرحتك ...
لا يعرف اسمك ولا قسمتك....هو ماشي حسب نيتك...
والنية بتكون فيها حاضر..بس اسمك غايب واخير... وعشان ماتدورش كتير..لو ليك قالب مركز كبير..يعرف قالب من ابو طراطير..يوصي عليك قالب مجاني ..تبقي ساعتها واحد تاني..انت نفسك ماتعرفهوش..
اما بقي لو ماتعرفش قالب ..ولا ليك في القالب ....مهما عملت ..حتطلع خايب...
حتبقي في ازمه .ملكش لزمه ..ضربك بالجزمه حاجه يوميه..
ولو مش يوميه ودماغك شايلاك....تهرب من الجزمه ..تلاقي افاك...
تغمز للحظ. تفتكره معاك ...تلاقي عفريت العلبه بيستناك ..
وعفريت العلبه برضه في قالب .اه والله هو في قالب....متوصي عليه من واحد شايب..مستني يرجعه شباب..
يستني ماهو اصله عايب ...وانت حتفضل .عايش في مقالب..
نصيحه بسرعه...اخترلك قالب ..قبل ما تبقي انت القالب ...
...,,وساعتها عليك تختار ..
ياتعيش ببخت خايب ..ياتاكل الزبده قوالب