عـم يونس راجل مصري غلبـان , مـاهو أصل كـل المصريين غلابـه , مش كلهم يعنـي الصـراحـة , لأن فيه كمـان ديـابه , لكـن عـم يـونس كـان من الغلابـه , عـايش يـومـه بيومـه , لا شـاغـل بـاله ببكره , ولا بيفكـر فى بعده , لمـا يطلع النهـار يقول يـافتاح يـاعليم يـارزاق يـاكـريم , إبسطها يابـاسط , كـان بيقف بعربية فـول , أهـو بيجري على أكـل عيشه , وعنده خمس عيـال , مـاشاء الله لا حـول ولا قـوة , كبيرتهم فـاطمه ,  وساكنين فى قوضتين , هتقولي إزاى ؟؟. هقولك معرفش بس أهي عيشه والسلام , مش هقولكم طبعـاً بيأكلهم إيه ومنين !!!  , ولا اللحمة بيشوفها كم مرة فى الشهر !! شهر إيه  قـاصدي فى السنه !!!! لكن عم يونس لا عمـره حلم بقصـر ولا جـاه , ولا حلم إنه يصيف فى السـاحـل أو شـرم , دا حتى يمكن مايسمعش عنهم , ولا حتى فى التليفزيون , طبعـاً وهـو اللى زي عم يـونس فـاضي يتفرج على تليفزيونـات !!!! كـل اللى كـان عـايزه وبيتمناه من ربنـا , إنـه يربي عيـاله بالحلال , ويشوفهم متعلمين , ويفرح بكل واحد فيهم ويطّمن عليهم  قبـل مـايقـابـل وجـه كريم .

 

من عربية الفـول إتعلمت فـاطمه وإخوتها الأربعـة ,  فاطمه دخلت تمريض علشان تخلص بدري وتطلع تشتغل علطول , وتساعـد أبوهـا الغلبان وأمها الشقيانه فى تربية أخواتها التانيين , بس فـاطمه كبرت وإحلوت وخطابها كتروا , وعـم يـونس غلبان لا حيلته قيـراط ولا فـدان , وفـاطمه عـايزه تتجهز , وهيجيب منين فلوس الجهاز  ؟! , لكن عـم يونس سابها على الله وقصد بـاب الكريم اللى عمره ماقفـل بـابه فى وش عبـاده , إستلف قرشين من هنا على قرشين من هنا , على مساعـدة من ولاد الحلال , على قرض صغير من البنك , وربنـا سترها وفـاطمه إتجوزت , بس بعد ماإتقطم وسط أبوهـا وأمها , لكن فـرحة الضنى غالية , وبتهون معـاهـا أى حـاجه , وبدأت الديّـانه تدق عالبيبان , وعم يونس ملتزم بتسديد القرض كل شهر , وعربية الفول , هتعمل إيه ولا إيه ولا إيه , كلام فى سركم دى مابتأكلش عيش حـاف فى الغلا اللى إحنا فيه .

 

كبـرعـم يونس  والصحة مبقتش  مساعداه وزادت عليه الديـون و الهموم , مابين 4 عيـال وأمهم عايزين يـاكلوا كـل يـوم , دا غير إيجـار القوضتين اللى سـاكن فيهم , أه ماهو انا نسيت أقولكم  إن القوضتين اللى سـاترين عم يونس وعياله ( إيجار ) , يعني الراجل هيلاحقها منين ولا مين , دا حتى مراته اللى كانت بتساعده فى شوية الفول اللى بيسرح بيهم الصبح , بقيت مريضة سكـر وضغط وقلب وحاجات تانية كتير , وكـل يـوم والتاني محجوزه فى المستشفى , وطبعـاً مستشفى حكومي , يعني لا رعـاية ولا إهتمامام ولا أى حاجه , ومصاريـف العلاج كترت ولسه فى بنات عايزه تتجوز , وعيال تـانيه ماكملتش تعليمها , والناس اللى ليها فلوس عنده لو صبـرت  يوم ولا إتنين مش هتصبـر التـالت , ماهو الحال من بعضه وكله حالته تعبانه واللى لـه قرش فى الزمـان دا عن حد مابيسكتش عليه.

 

بذمتكم واحد زى عم يونس بظـروفـه دي  , لمـا يكون عايش فى وسط مجتمع فيه رجـال أعمال بتعمل حفلات عالفاضي وعالمليان بـالملايين , وفيه مرشحين بيصـرفـوا الملايين بـرضه على الداعايـا الانتخابية , وفيه لاعيبة كـرة بيبقضوا بالملايين فى الشهـر و ممثلين بتقبض بالملايين فى مسلسل واحد , الراجل  لما يسمع عنه الكلام دا , إيـه ممكن يجرالوا ؟؟

وكمـان أنا راضي ذمتكم واحد زيـه يفرق معاه  فى إيـه البخـاري صح ولا غلط !!!..او الحزب الوطني يتهد ولا مايتهدش ...ولا الممثلة الفلانية إتجوزت من الممثل الفلاني ولا دي إشـاعات !!  او الاعب الفلاني هينتقل للنادي العلاني ولا لأ !!!!

بالمناسبة عـم يـونس راجل ملوش فى السياسة , زى اغلب المصريين , ولا يفـرق معاه فـلان أو عـلان او الحزب الفلاني أو العلاني , والراجل طول عمره بيحب بلده رغم كل المرار اللى طافحه طول حيـاته , وعمره ماقال على بلده كلمة وحشه , لأنه راجل أصيل  ويعرف الأصول كويس , بس كمان لازم حد يقدره , ويعوضه على المرار اللى شـافه .

 

على فكـره ممكن حكاية عـم يـونس تكون إفتراضية , لكنها واقعية فى نفس الوقت لأنها موجوده حوالينا فى كل حته , ايوه فى زى عـم يونس كتير جداً , وماحدش سائل فيهم ولا مهتم بيهم , آن الأوان حـد ينصفهم ويعيشولهم يومين مرتاحين , مش كتير عليهم والله .